गर्मीमा छालाको हेरचाह कसरी गर्ने ?

डा.रिषभदेव त्रिपाठी

गर्मीयाममा तापक्रम बढ्ने भएकाले छालामा धेरै प्रकारका समस्या देखा पर्छन् । गर्मीकै कारणले घमौरा, पसिनाको एलर्जी , रौँको एलर्जी हुने गर्छ । साथै पसिना पनि धेरै निस्कने भएकाले ‘फर्मल इन्फेक्सन’ पनि हुने गर्छ । त्यो बाहेक युभी–लाइटको डेन्सिटी बढ्नाले घामको एलर्जी हुने गर्छ । सुख्खापनको कारणले गर्दा छाला फुट्ने, चिलाउने समस्या देखा पर्छ ।

छालामा पसिना निकाल्ने ग्रन्थि थुनिएर छालाभित्र नै पसिना रह्यो भने घमौरा आउँछ । बच्चाहरूमा पसिना निस्कने ग्रन्थिको राम्ररी विकास भएको हुँदैन । जब शरीरमा पसिना धेरै निस्किन्छ त्यो पसिना शरीरबाट बाहिर निस्कन पाएन भने समस्या देखा पर्छ ।

बच्चामा मात्र नभएर ठुलो मानिसमा पनि विभिन्न समस्या देखा पर्छन् । टाइट लुगा लगायो भने पसिना बाहिर निस्कन पाउँदैन । वा धेरै समय ननुहाउने मानिसमा पनि यस्ता समस्या देखा पर्छन् । कसैलाई धेरै ज्वरो आएको छ भने पसिना बाहिर निस्कन पाउँदैन र घमौरा आउन सक्छ।

बच्चाहरूमा धेरै समस्या
बच्चाहरूमा सुरुको एक दुई हप्तामा धेरै घमौरा देखिन्छ । जति उमेर बढ्दै जान्छ, पसिना निस्कने ग्रन्थि पनि विकसित हुँदै जाने भएकाले समस्या कम हुँदै जान्छ। बच्चाहरूमा काखीहरुमा आउँछ । बच्चाहरुको फेसमा ठुलो–ठुलो पिलो जस्तो देखिने फोका पनि आउने गर्छ ।

मानिसमा पनि नआउने भन्ने त होइन, कसैको ढाडहरुमा देखिन्छ । घमौरा कतिपय अवस्थामा उपचार नगरी पनि निको हुन्छ । घमौरा धेरै फैलिएको छ भने इन्फेक्सन पनि हुन्छ । यस्तो अवस्थामा एन्टिबायोटिक क्रिम लगाउनु पर्ने हुन्छ ।

पसिना निकाल्ने ग्रन्थिको प्वाल कुन लेभलमा थुनिएको छ, त्यो अनुसार घमौरा आउने गर्छ । एकदमै तल्लो लेभलमा थुनिएको छ भने ठूलो–ठुलो घमौरा आउने गर्छ । माथिल्लो लेभलमा थुनिएको छ भने पानी फोका आउन सक्छ । सामान्यतया आउने भनेको रातो रातो नै हुन्छ । यदि इन्फेक्सन भयो भने दुई–महिना एन्टिबायोटिक क्रिमसँगै औषधी खानु पर्ने हुन्छ।

उपचार कसरी गर्ने ?
साधारण रुपमा घमौरा निको पार्न चिसो पानीमा रुमाल भिजाएर छालालाई सफा गर्‍यो भने पसिना निकाल्ने ग्रन्थिको प्वाल खुल्छ । अनि बिस्तारै कम हुन्छ । साथै घमौरा भएको अवस्थामा कटनको लुगा लगाउने, सरसफाइमा ध्यान दिने गर्नु पर्छ । कसैलाई धेरै आयो भने माइल्ड स्टोरोइड क्रिम, क्यालामाइन लोसन लगाउनाले पनि केही कम हुन्छ ।

यदि इन्फेक्सन भएको छ भने एन्टिबायोटिक क्रिम दिने गरिन्छ । डाक्टरको सल्लाहबिना कुनै पनि क्रिम वा पाउडरको प्रयोग गर्नु हुँदैन । यस्ता प्रयोगले पसिना निकाल्ने ग्रन्थिको प्वाल थुनिन सक्छ । प्वाल थुनियो भने समस्या झन् बढ्न सक्छ ।

समस्या आउन नदिन के गर्ने ?
सरसफाइमा विशेष ध्यान दिनु आवश्यक छ । चिसो पानीले नुहाउने, कटनको लुगा लगाउने, टाइट लुगा नलगाउने, शरीर छोप्ने लुगा लगाउने गर्दा भने समस्या आउन कम हुन्छ । यस्तै, लोसन, मोस्चराइजर लगाउने, दिनमा ७ देखि ८ गिलास पानी पिउने गर्नु पर्छ ।

फेसको लागी फेसवास, सन् स्क्रिन क्रिम लगाउने, छाताको प्रयोग गर्ने गर्नुपर्छ । खाने कुरा भिटामिन ए, भिटामिन सी, भिटामिन ई, र एन्टिअक्सिडेन्ट भएका फलफूल र तरकारी खाँदा राम्रो हुन्छ । बाहिरका खानेकुरा ‘जकंफूड’ कम खानु पर्छ ।

खबरहव

Leave A Reply

Your email address will not be published.